काठमाडौं ११ असार/ उपप्रधानमन्त्री एवम् शिक्षामन्त्री गोपालमान श्रेष्ठले स्थानीय तहको निर्वाचनसँगै सामुदायिक विद्यालयको शिक्षा राम्रो हुने बताउनुभएको छ ।

नेपाली काँग्रेस स्याङ्जा– काठमाडौँ सम्पर्क समितिले उपप्रधानमन्त्री एवम् शिक्षामन्त्री श्रेष्ठलाई बधाई तथा सम्मान दिन बसुन्धारामा आयोजना गरेको कार्यक्रममा उपप्रधानमन्त्री श्रेष्ठले स्थानीय तहलाई दिइएको अधिकारसँगै सामुदायिक विद्यालयको शिक्षा गुणस्तरीय हुने विचार व्यक्त गर्नुभयो ।
उहाँले भन्नुभयो, “व्यावहारिक शिक्षातर्फ मुलुकलाई अगाडि बढाउने सोच मन्त्रालयले गरिरहेको छ ।”उहाँले निजी विद्यालयका तुलनामा सामुदायिक विद्यालयले राम्रो अङ्क ल्याउन नसकेको भन्दै राम्रो अङ्क ल्याउन नसक्ने विद्यार्थीलाई जीवन उपयोगी शिक्षा दिनुपर्ने बताउनुभयो ।
उपप्रधानमन्त्री श्रेष्ठले जनताको इच्छा, आकाङ्क्षा र चाहनाअनुसार मुलुकलाई अगाडि बढाउने भन्दै स्याङ्जा जिल्ला र शिक्षा मन्त्रालयको शिर नझुक्ने गरी काम गर्ने बताउनुभयो ।
नेपाली काँग्रेस स्याङ्जाका सभापति एवम् सांसद कमलप्रसाद पङ्गेनीले तीन तहको निर्वाचन गरी संविधान कार्यान्वयन गर्नुपर्ने बताउनुभयो ।

गोरखापत्रमा प्रकाशित खबर ।