काठमाडौं - नेपाल शिक्षक महासंघले जारी सडक प्रदर्शन अन्त्य गर्ने भएको छ । असार १५ गते भित्र प्रतिनिधि सभाबाट शिक्षा विधेयक पारित गर्न संसदीय समिति, मुख्य दलका मुख्य सचेतकहरु सहित भएको छलफलमा सहमती भएसँगै प्रदर्शन अन्त्य गर्न महासंघ सहमत भएको हो । 

विधेयक जारी गराउने एक मात्र लक्ष्य लिएर शुरु गरेको सडक  प्रदर्शनले ऐन जारी गर्ने मिति नै तोक्नु सफलता भएको महासंघका अध्यक्ष लक्ष्मीकिशोर सुवेदीले दावी गरे । 

सहमती पछि मन्त्रालयमा भएको पत्रकार सम्मेलनमा बोल्दै उनले विगत देखिका सहमतीलाई ध्यानमा राखि सहमती गरेको बताए । 

वृत्ति विकास र सेवा सुविधाको माग मन्त्रीपरिषद्बाट निर्णय भएको बताउँदै उनले आजकै मितिबाट सडक प्रदर्शन स्थगित भएको बताए । तोकिएको समयमा ऐन जारी नभएमा अहिले भन्दा कडा आन्दोलनमा जान वाध्य हुने उनले बताए ।  
सडक आन्दोलन रोकिएपनि पक्षीकरण जारी रहने उनले बताए । 

शिक्षक संग भएको सहमतीसँगै आठ अर्व दायित्व थप हुने बताउँदै शिक्षा मन्त्री रघुजी पन्तले अब निर्वाध शैक्षिक गतिविधि सञ्चालन हुने बताए ।