भक्तपुर - सूर्यविनायक नगरपालिकामा एसईईमा उत्कृष्ट नतिजा ल्याउने अरनिको माध्यमिक विद्यालयले आफ्ना विद्यार्थीलाई सम्मान गरेको छ । विद्यालयले बुधबार एक कार्यक्रम गरेर ग्रेडेड ७५ विद्यार्थीलाई सम्मान गरेको हो । 
अरनिकोका ७६ जना विद्यार्थी एसईईमा सहभागी भएकोमा ७५ जना ग्रेडेड भएका छन् । यो नगरपालिकाकै उत्कृष्ट नतिजा भएको नगरपालिकाको शिक्षा शाखा प्रमुख रत्न कटुवालले बताए । 

‘नगरमा थोरै विद्यार्थी सहभागि भएर सत प्रतिशत ल्याउने विद्यालय पनि छन् तर, उच्च जीपीए सहित सबैजसो विद्यार्थी ग्रेडेड गराएर अरनिकोको नतिजा उत्कृष्ट छ’ उनले भने । 

विद्यालयका प्रधानाध्यापक महेन्द्रकुमार श्रेष्ठले यसपालि प्राप्त ३.८७ जीपीएको नतिजा विद्यालयको अहिलेसम्मकै उत्कृष्ट रहेको बताए ।  गतवर्ष ८२ प्रतिशत ग्रेडेड भएकोमा यसपाली ९९ प्रतिशत पु¥याउन सफल भएको उनले बताए । 

‘यो नतिजालाई कायम गर्दै सत प्रतिशत पुर्‍याउने विद्यालयको आगामी लक्ष्य हुने छ’ उनले भने । 

७५ मध्ये ३.६ जीपीए भन्दा बढी ल्याउने मध्ये नै १९ जना अर्थात २५ प्रतिशत छन् । त्यस्तै ३.०१ देखि ३.८७ जीपीए ल्याउने ६३ जना अर्थात ८४ प्रतिशत छन् । 

सिकाइमा कमजोर भएकाको पहिचान गरेर उपचारात्मक कक्षा चलाउने, नियमित कक्षा बाहेक बिहान बेलुका अतिरिक्त कक्षा, हरेक विद्यार्थीलाई निगरानी गरेरकै कारण नतिजा सुधार गर्न सकेको प्रधानाध्यापक श्रेष्ठले बताए । हरेक परीक्षा पछि गरिने नतिजाको विश्लेषण गर्ने कार्यले पनि नतिजा सुधारमा काम गरेको उनले बताए । 

‘शिक्षक र विद्यार्थीको मेहनत, अभिभावकको साथले नतिजा सुधार गरेर हामी यहाँसम्म आइपुगेका हौँ’ उनले भने । 

विद्यालयका पूर्व प्रधानाध्यापक प्रेमबहादुर खड्काले विद्यालयको नतिजाले सामुदायिक विद्यालयको हैसियत देखाइदिएको बताए । ‘नतिजासंगै विद्यार्थीलाई संस्कार र सिप पनि सिकाउने व्यवस्था मिलाउनु जरुरी छ’ उनले भने । 

व्यवस्थापन समितिका अध्यक्ष एवं वडा नम्बर चारका वडा अध्यक्ष लक्षुराम न्यौपानले विद्यालयको गुणस्तर सुधार गर्न आवश्यक भौतिक पूर्वाधार, शैक्षिक कार्यक्रममा कुनै कमी आउन नदिने बताए । 

‘अहिलेसम्म नगरपालिकाको साथ छँदैछ । यस अनुसार नगरले नै गर्व गर्ने नतिजा आएको छ’ उनले भने,‘आगामी दिनमा यसलाई कायम राख्दै अझ गुणस्तर बढाउन काम गर्नु पर्नेछ । स्रोतको कमी हुने छैन ।’ 

व्यवस्थापन समितिका शिक्षक प्रतिनिधि पाण्डप अधिकारीले विद्यार्थीको नतिजाले शिक्षकको मेहनतलाई समेत देखाइ दिएको बताए । 

‘शिक्षकले जति मिहेनत गरेका थियौँ । त्यसको नतिजा आएको छ । विद्यार्थीसंगै शिक्षक पनि सफल भएका छौँ । यसलाई निरन्तरता कायम हुने गरी फेरी काम गर्नु पर्ने भएको छ’ उनले भने ।

कक्षा ११, १२ मा अध्ययापन गराउँदै आएका शिक्षक एवं उद्योग वाणिज्य संघ भक्तपुरका बरिष्ठ उपाध्यक्ष कृष्ण मुरारी न्यौपानेले जुन विद्यालयबाट उत्कृष्ट जीपीए साथ ग्रेडेड भएको हो त्यही ११ र १२ समेत सञ्चालनमा रहेकोले भर्ना हुन आग्रह गरे । बजारको माग अनुसारको जनशक्ति उत्पादन गर्ने अरनिकोमै पढाई हुने भएकोले आफ्नै विद्यालयमा पुनः पढाई गर्न उनले विद्यार्थीलाई आगह गरेका हुन् ।

‘घर छेउमा पढ्दा न गाडी भाडा लाग्छ न त खाजा र खानाकै बढी पैसा लाग्छ’ उनले भने,‘घरको खाना खाएर सस्तोमा अध्ययन गर्न पनि अरनिको रोज्नुस्’ विद्यार्थीलाई उनले भने ।