काठमाडौ - सार्वजनिक शिक्षा प्रवर्द्धन अभियानका अभियन्ताको एक टोलीले भावी प्रधानमन्त्रीको घोषणा गरेर चुनावमा  होमिएका उम्मेद्वाहरुलाई भेटेर शिक्षालाई चुनावी एजेण्डा बनाउन ध्यानाकर्षण गराएको छ । प्रतिनिधि सभाको आसन्न निर्वाचनमा प्रतिस्पर्धा गरेका मध्ये केही दल प्रधानमन्त्री तोकेरै चुनावी प्रचार प्रसारमा छन् । प्रधानमन्त्रीका दावेदार बनेका पाँच दलका पाँच उम्मेदवारहरुलाई अभियन्ताहरुले स्थलगत रुपमै भेटेर ऐन नियम निर्माण गर्दा सार्वजनिक शिक्षाका सवाललाई समेट्न ध्यानाकर्षण गराएका हुन् । 

धरानबाट शुरु गरिएको उक्त अभियानका क्रममा अभियन्ताहरुले श्रम संस्कृती पार्टिका अध्यक्ष हर्क साम्पाङ्लाई उनकै पार्टि कार्यालय अघिल्तिरको चिया पसलमा भेटेका थिए ।

उज्यालो नेपाल पार्टिका अध्यक्ष कुलमान घिसिङ्लाई धरानको भानुचोकमा आयोजित सभाको मञ्चमै भेटेका थिए ।

नेकपा एमालेका अध्यक्ष केपी ओलीलाई झापा दमक स्थित प्रचार प्रसारका लागि तोकिएकोे घरको बैठक कोठामा र नेपाली कांग्रेसका सभापति गगन थापालाई चुनावी अभियानमा घर दैलो गर्दै गर्दा सर्लाही स्थित बलाराको सडकमै भेटेर ध्यानाकर्षण गराएका छन् ।

प्रधानमन्त्रीका अर्का उम्मेद्वार राष्ट्रिय स्वतन्त्र पार्टिका बरिष्ठ नेता बालेन्द्र शाह बालेन झापामै भए पनि उनीसँग भने टोलीले प्रत्यक्ष भेटघाट गर्न सकेन । टोलीले उनको सचिवालयका सदस्यहरुसँग पार्टिको सम्पर्क कार्यालयको प्रेक्षालयमा लामो छलफल गरेको छ । 

सामाजिक सामानताको आधार शिक्षा भएको र सार्वजनिक शिक्षा प्रणाली बलियो भए पछि मात्रै त्यो सम्भव हुने भन्दै हुने खाने र हुँदा खानेका लागि विद्यमान फरक शिक्षा प्रणालीको अभ्यास अन्त्य गर्ने गरी ऐन निर्माण गर्न टोलीले ध्यानाकर्षण गरेको छ । संविधानले शिक्षा अधिकार सुनिश्चित गरेको स्मरण गराउँदै शिक्षालाई नाफा मूलक ब्यापारको क्षेत्र यथावत राख्ने  प्रवन्ध सच्याउने गरी ऐन निर्माण गर्न टोलीले ध्यानाकर्षण गराएको हो । अधिकाँश उम्मेद्वारले सार्वजनिक शिक्षाका सवालमा प्रतिवद्धता व्यक्त गरेका छन् । बालेनको सचिवालयका सदस्यहरुले पनि आवश्यकता अनुसार विज्ञहरुको राय लिने र तदनुरुप नै शैक्षिक विषयलाई सम्बोधन गर्ने प्रतिवद्धता जनाएको छ । उक्त भेटघाटमा बालेनको सचिवालयका सञ्जिव पाण्डे, सुवास बस्नेत र विवेक वास्तोला सहभागी थिए । उनीहरुले अभियन्ताहरुको अवधारणा र सुझाव टिपोट गरेका छन् । 

भोट हाल्नु अघि पार्टिका घोषणापत्र पढ्न, उम्मेद्वारका विचार र योजना सोध्न टोलीले आम मतदातालाई पनि आग्रह गरेको छ । उम्मेद्वारलाई आफ्ना क्षेत्रको शैक्षिक सुधार गर्ने विचार, सार्वजनिक विद्यालय सुधारका नीति र व्यवस्थाका बारेमा प्रश्न सोध्न उनीहरुले मतदातालाई आग्रह गरेका छन् । 

आफ्ना उम्मेदवारलाई जीवनका आधारभूत सरोकारका सवालसँग सम्बन्धित सार्वजनिक शिक्षा, विष रहित खाद्य, दिगो र पर्यावरण मैत्री खेतिपाती आम मानिसको स्वास्थ्य सुरक्षासँग सम्बन्धित प्रश्न गर्नु आवश्यक रहेको भन्दै टोलीका सदस्यहरुले मतदातालाई समेत आग्रह गरेका छन् ।

सार्वजनिक शिक्षा, कृषि र जनस्वास्थ्य क्षेत्रका अभियन्ताहरुको उक्त टोलीमा राष्ट्रिय शिक्षा आयोग २०७५ का सदस्य समेत रहेका कृषि विज्ञ डा. कृष्ण पौडेल, अभियानका तर्फबाट शिक्षाकर्मी टीका भट्टराई, जनस्वास्थ्य विज्ञ डा. अरुणा उप्रेती संलग्न थिए । यस्तै खाद्यका लागि कृषि अभियानका उद्धव अधिकारी, शिक्षा नीति तथा अभ्यास केन्द्रका अनुप सुवेदी र उषा तितिक्षु, प्राकृतिक कृषि प्रणालीमा अभ्यास गरिरहेका माधव ढुङ्गेल, एडुखबरका सम्पादक श्रीधर पौडेल लगायतका अभियन्ता उक्त टोलीमा सहभागी थिए । 

खाद्य उत्पादन, आम मानिसको स्वास्थ्य तथा वातावण र पर्यावरणमा आएको संकट समाधानको उपाय खोज्न मद्दत गर्ने काम शिक्षाले गर्ने भन्दै टोलीले सार्वजनिक शिक्षाको गुणस्तर प्रति आम मतदातालाई सचेत हुन पनि आह्वान गरेको छ ।  

उक्त अभियानका क्रममा भेट्न सम्भव भएका अन्य क्षेत्रका उम्मेदवारसंग पनि अभियन्ताहरुले जनसरोकारका सवाल प्रस्तुत गरेका छन् । राष्ट्रिय स्वतन्त्र पार्टिका उम्मेद्वार गोमा तामाङ् र स्वतन्त्र उम्मेद्वार देउमान बुढालाई धरानमा, श्रम संस्कृती पार्टिका उम्मेद्वार समीर तामाङ् र नेकपाका रञ्जित तामाङ्लाई झापाको दमकमा भेटेको थियो । यस्तै नेकपाका उम्मेद्वार गिरिराजमणि पोखरेललाई बर्दिबासको गौरीडाडाँमा, नारायणकाजी श्रेष्ठलाई सर्लाहीको राजघाटमा र नेपाली कांग्रेसकी मीना खरेललाई चितवनको मुङ्लिनमा टोलीले भेटेर जनजीविकाका साझा सवालबारे ध्यानाकर्षण गर्दै प्रश्न र छलफल गरेका थिए । यी सबै उम्मेद्वारहरुले आआफ्ना तर्फबाट प्रतिवद्धता जनाएका छन् ।