काठमाडौं–प्रधानमन्त्री केपी ओलीले त्रिभुवन विश्वविद्यालयको जग्गा खोजबिन  समितिले अधुरै राखेको जग्गाको खोजी गर्न अर्को समिति गठन गर्ने बताएका छन् । 

विश्वविद्यालयको जग्गा तथा अचल सम्पत्ति खोजबिन  समितिले सिफारिस गरे अनुसार कारबाही अगाडि बढाउने र अधुरै रहेको अनुसन्धान गर्न अर्को समिति बनाउने ओलीले बताएका हुन् । समितिले मंसिर १४ मा छानबिन सकेर तयार गरेको प्रतिवेदन मंगलबार प्रधानमन्त्री ओलीलाई बुझाएको छ । शिक्षा, विज्ञान तथा प्रविधिमन्त्री विद्या भट्टराई र विश्वविद्यालयका पदाधिकारीसहितको उपस्थितिमा आयोगका संयोजक महेन्द्र थापाले प्रधानमन्त्री निवास बालुवाटारमा प्रधानमन्त्री ओलीलाई मंगलबार प्रतिवेदन बुझाएका हुन् । 

समितिले त्रिविको एक हजार रोपनी विभिन्न संघ संस्थालाई भोगचलन गर्न दिएको जानकारी प्रधानमन्त्री ओलीलाई ब्रिफिङ गरेको छ । त्यस्तै ललितपुरको लुभुमा तीन सय ७५ रोपनी जग्गा पत्ता लागे पनि समय अभावले खोजीलाई पूर्णता दिन नसकेको जानकारी समितिले गराएको छ । नैकापको एक सय २५ रोपनी जग्गा त्रिविको भए पनि व्यक्तिले प्रयोग गरिरहेको प्रतिवेदनमा उल्लेख छ । 

सरकारले सारदा त्रितालको संयोजकत्वमा समिति बनाएको भए पनि त्रिताल बिरामी भएपछि महेन्द्र थापालाई संयोजक तोकिएको थियो ।  प्रतिवेदनले विसं २०१३ सालदेखिका त्रिविको कीर्तिपुर, नैकाप, लुभु लगायत  काठमाडौँ उपत्यकाका २१ क्याम्पसका जग्गाको अवस्था, दुरुपयोग र उपयोगका लागि समाधानका उपायहरूसमेत सुझाएको छ । समितिले जग्गाको दुरुपयोग भएका सम्बन्धमा अख्तियार दुरुपयोग आयोग र  प्रहरीको केन्द्रीय अनुसन्धान ब्युरोमा लेखी पठाउन पनि सुझाव दिइएको छ ।