अब सबै शिक्षक स्थायी ! हरेक बर्ष विज्ञापन खोल्ने मन्त्रीको भनाई


लमजुङ् - शिक्षा मन्त्री धनिराम पौडेलले अब देखि देशमा रहेका सबै शिक्षक स्थायी हुने र यसका लागि हरेक बर्ष विज्ञापन खोलेर शिक्षकको पदपुर्ती गर्ने तयारी भईरहेको बताएका छन् । भोटेओडारमा रहेको भक्ति नमूना माविको स्वर्ण महोत्सब समारोहलाई मंगलबार सम्बोधन गर्दै मन्त्री पौडेलले सामुदायिक विद्यालयमा १७ प्रकारका शिक्षक हुँदा पठन पाठन कमजोर बनेको बताए । निर्माणको चरणमा रहेको शिक्षा नियमावलीमा एकै प्रकारका शिक्षक रहने र ती सबै स्थायी हुने गरी व्यवस्था गर्न लागेको उनले बताए ।  

१७ प्रकारका शिक्षक र तिनले पाउने सेवा सुविधा फरक फरक हुँदा सामुदायिक शिक्षाको क्षेत्रमा विकृति विसंगति वढेको उनको भनाई थियो । अब कुनै पनि शिक्षकले एक बर्षभन्दा वढी अस्थायी शिक्षक भएर काम गर्नु नपर्ने गरी मन्त्रालयले नियमावलीमा व्यबस्था गर्न लागेको मन्त्री पौडेलले बताए ।

सामुदायिक विद्यालयको पठन पाठनप्रति अभिभावक र विद्यार्थीलाई विश्वास नहुँदा बर्षेनी सरकारी विद्यालयमा विद्यार्थीको संख्या घट्दै गएको उनका भनाई थियो । प्रत्येक शिक्षकलाई ‘मेरो प्रमुख दायित्व विद्यार्थीलाई गुणस्तरीय शिक्षा दिनु हो र त्यसकै लागि मलाई सरकारले तलब भत्ता दिएको हो’ भन्ने सम्झिएर काम गर्न उनले आग्रह गरे ।

मुलुकको राजनीतिक प्रणालीमा भएको परिवर्तन शिक्षा क्षेत्रमा पनि देखिनु पर्नेमा जोड दिदैं उनले राजनीतिक प्रणालीलाई संवोधन गर्ने खालको शैक्षिक प्रणाली स्थापना गर्न सरकार लागि परेको दावि गरे ।

कार्यक्रममा सांसद लालबहादुर गुरुङ, जिल्ला शिक्षा अधिकारी खड्गबहादुर कमाल, नेपाली कांग्रेस लमजुङका सभापति भेषबहादुर पौडेल, एमालेका भिमबहादुर गुरुङ लगायतले विद्यालयलाई शुभकामना दिएका थिए । कार्यक्रममा विद्यालयका प्रधानाध्यापक उत्तरकुमार श्रेष्ठले विद्यालयको प्रगति विवरण प्रस्तुत गर्दै अंग्रेजी माध्यमबाट पठनपाठन शुरु भएपछि विद्यार्थी संख्या बढेको जानकारी दिए ।

कार्यक्रममा मन्त्री पौडेलले विभिन्न प्रतियोगिता र पढाईमा उत्कृष्ट विद्यार्थीलाई नगद पुरस्कार र प्रमाण पत्र प्रदान गरेका थिए । मन्त्री पौडेल जिल्ला शिक्षा कार्यालय र जिल्ला प्रशासन कार्यालयले बेसीशहरमा आयोजना गरेको कार्यक्रममा पनि सहभागि भएका थिए ।