काठमाडौ त्रिभुवन विश्वविद्यालयको उपकुलपतिको पदावधि सकिए पछि दैनिक कार्य सञ्चालन गर्न शिक्षाध्यक्ष प्रा.डा. शिवलाल भुषाललाई जिम्मेवारी तोकिएको छ । विश्वविद्यालयका उपकुलपति प्रा.डा. धर्मकान्त बास्कोटाको पदावधि गत कात्तिक १६ गते देखि सकिएको छ । त्यसैले उपकुलपतिको पदपूर्ति नभएसम्म विश्वविद्यालयको दैनिक कार्य सञ्चालनका लागि कुलपति समेत रहेका प्रधानमन्त्री पुष्पकमल दाहालले भुषाललाई जिम्मेवारी तोकेका हुन् । 

गत १७ गतेको निर्णय अनुसार भुषाललाई जिम्मेवारी तोकिएको प्रधानमन्त्री तथा मन्त्रपिरिषद् कार्यालयले जनाएको छ । 

विश्वविद्यालय ऐन २०४९ को दफा २१ ख मा विश्वविद्यालयको कुनै पद रिक्त भएमा पदपूर्ति नभए सम्म बढिमा तीन महिनाका लागि उपकुलपतिको जिम्मेवारी सहकुलपतिको परामर्शमा कुलपतिले र अन्य पदाधिकारीको जिम्मेवारी उपकुलपतिले कुनै बरिष्टतम् प्राध्यापकलाई तोक्ने व्यवस्था छ । २१ क मा भने पदाधिकारीको पद रिक्त भएमा तीन महिना भित्र नयाँ नियुक्ति गर्नु पर्ने व्यवस्था छ । 

तत्कालिन प्रधानमन्त्री केपी शर्मा ओली नेतृत्वको सरकारले २०७६ चैत ६ गते विश्वविद्यालयको शिक्षाध्यक्ष (रेक्टर) मा मानविकी तथा सामाजिक शास्त्र संकायका डिन रहेका भुसाललाई नियुक्त गरेको थियो । 

त्यस अघि सोही सरकारको पालामा कात्तिक १७ गते उपकुलपति नियुक्त बाँस्कोटाले १८ गते पदभार ग्रहण गरेका थिए । भदौ ५ गते तत्कालिन उपकुलपति तीर्थ खनियाँको कार्यकाल सकिए पछि सरकारले तत्कालिन शिक्षा मन्त्री गिरिराजमणि पोखरेलको संयोजकत्वमा उपकुलपति नियुक्तिका लागि नाम सिफारिस गरिएको थियो । 

आफ्नो कार्यकाल सकिनु अघि बास्कोटाले गत बुधबार सञ्चारकर्मीलाई बोलाएर प्रगती सुनाएका थिए । 

पढ्नुहोस् : विश्व वरीयतामा खस्के पनि सञ्चारकर्मीलाई बोलाएर सुधारका फेरहिस्त सार्वजनिक !